السلام
وصلني اليوم إيميل يبلغني عن أن هناك اضراب سيقام تحت شعار ( الله يديم الرخص )
ونص الرسالة تقول :
الإضراب عن الأسواق تاريخ: 6/3/2008الشعار:الله يديم الرخص
السلام عليكم اخواني و خواتي الكويتين والكويتيات طبعاً اكيد ميتين من الحره على ديرتكم و اللي قاعد يصير فيها من مصخره و اللي بلا شك يثبت الاستخفاف بعقولنا كلنا! يعني يوم يقولون بيزيدون المعاشات... باجر الصبح زايدين الاسعار! مو المعاشات و المجلس ما سوى (وماراح يسوي) شي ... و كل يوم اعلان بالجريده راح نزيد معاشات الشعب 40% و الأسعار تزيد 40% بقدرة قادر!!!يانيين و ميننينا وياهم! حتى ستاربكس و اللي اهو شبه المتنفس الوحيد حقنا صارت اسعاره فوق... و كافيه كوستا اللي يلوع الجبد زاد اسعاره علينا اللي الكيكه البايته مالته كانت ب 900 فلس الحين مو اقل من دينار و 450 فلس و الجمعيه فضت ما فيها شي صارت جنها فرع و كل شي فيها غالي! قبل 10 دنانير تسوي شغل بالجمعيه الحين صارت جنها دينار... و ايام قبل كرتون الطماط كان 480 فلس الحين صار كيلو الطماط يعادل كيلو الذهب و الكرتون صار ينباع بدينار و 680 فلستركوا الطماط و الكافيهات... السوق صار اييب اليهد! ما فيه هدوم مثل الاوادم ولبس الشباب صار يفشل و يضحك من محلات الهنود اللي فاتحينهم بالأفنيوز مثل توب كات و غيرهم لا و فوق شينهم قواة عينهم اسعار ناااااار صلخ جنه اللي مصمم الفانيله تيري موجلر ما جنها ميد ان اندونيسيا! فعلاً شي يفشل... المهم هالحجي هذا كله مو ياي من عدم و اكيد انتوا ملاحظين اللي قاعد يصير فأنا عندي اقتراح و ياليت تسمعوني: ليش ما نسوي اضراب؟ لا مو اضراب عن الطعام قصدي اضراب عن السوق و الكافيهات و المطاعم! الحين واحد يقول "يعني وقفت علي؟" اي حبيبي وقفت عليك!!! يعني انت تروح مطعم من مطاعم البحر ما تقط اقل من 15 دينار تخيل لو انت و 3 من ربعك ما رحتوا المطعم هذا... جم راح يخسر؟ 60 دينار! و اذا انتي يا اختي ما رحتي تشترين هدوم من مانغو ب 30 او 40 دينار و رفيجتج ما راحت زارا و شرت ب 20 دينار؟ شراح يصير بالسوق؟ تخيلوا الكويتين كلهم او اغلبهم يقعدون ببيوتهم ويك اند (يعني عطلة نهاية الاسبوع لا يقولون هذا يتفلسف) ويتغدون اموش يتعشون معكرونيه بالبيت بس ويك اند واحد اشراح يصير بالديره؟! ترى احنا مو شويه ما بقى شي و نصك ال1000000 نسمه مشالله لا اله الا الله يعني فعلا نقدر نغير اللي قاعد يصير و بيدنا نغير ديرتنا و نسنع الهوامير الحراميه اللي ما خافوا ربهم فينا... اذا محد قادر يسوي شي لازم احنا ندافع عن حقوقنا لأنه الاحوال قاعده تصير من سيء الى اسوء ولازم نوقف مع بعض كلنا و نحمر العين. التاريخ المقترح حق هالخطه اهو الخميس السادس من مارس 2008 و قلت اعطي الايميل شهر ينتشر بالكويت و انشالله اييب نتيجه و ينقذنا من اللي قاعد يصير والله يخليكم تبلغون اهاليكم اللي ما عندهم ايميل و توعون اخوانكم و خواتكم الصغار و الكبار عشان نقدر نغير اللي قاعد يصير كلنا نتعاون لأنه ايد وحده ما تصفق و عساكم على القوه نبدي حملتنا تحت شعار "الله يديم الرخص"
ونشوف نتايج هـ الاضراب :)
